Weider an de Süden..

A nees ass eng Woch ëm ! Mir fuere bei déi éischt Geysiren an de Wasserfall Gullfoss ! Ëmmer méi an de Süden.

Ënnerwee steet och nach e bëssche Geschicht um Programm. Zu Skalholts gi mir en historesche Site kucke wou den éischte Bëschof vun Island (1086) begruewen ass. 

Eng Höhl mat schéine Faarwen a super Akustik.

E Sonndeg hu mir en Ausflug op d’Insel Vestmannaeyjar gemaach. De Camper konnte mir um Parking vum Ferry stoe loossen. D’Insel ass bekannt gi well am Januar 1973 um zwou Auer an der Nuecht ouni Virwarnung de Vulkan Eldfell ausgebrach ass. Och nach haut gëtt engem bewosst wéi vill Gléck déi Leit haten an hirem Ongléck. All Awunner (5000 Leit) sinn evakuéiert ginn ouni dass e blesséiert ginn ass. Op eisem Tour mat engem Schëff ronderëm d’Insel huet eise Guide eis gezielt dass e Mann vun engem Hëllefsschëff op d’Idee koum d’Lava mam Waasser direkt aus dem Mier ofzekillen. D’Lava war um Wee an den Hafen ze lafe wat natierlech eng Rettung vun de Leit onméiglech gemaach hätt well da kee Schëff méi do hätt konnten era fir d’Leit ofzehuelen.

Mir fueren nach ëmmer op der Route 1 duerch Lava- a schwaarz Sandfelder. Einfach nëmme schéin !