Medinaceli
No féier Wochen huet eis d’Reesféiwer nees gepackt ! D’Fro war « wou kënne mir de kalen a fiichte Wanter verbréngen » ? Esou ass eis d’Idee komm fir a Marokko ze fueren. D’Kinneksstied hunn eis schonn ëmmer interesséiert a bestëmmt ass et do am Süde waarm ! Och ass Marokko franséisch sproocheg esou dass mir do kee Problem hunn eis ze verstännegen.
De 17te November si mir lassgefuer fir direkt scho 550 Km ze maachen. Bei Orleans hu mir un der Loire op enger Stellplaz geschlof. Et ass net vill Trafic esou dass mir och den zweeten Dag gutt viru kommen. No 560 Km schlofe mir hannert Toulouse zu Saint Lys op engem Camping. Witzeg ass dass d’Duechter vum Proprietär Affekot ass an zu Lëtzebuerg schafft a wunnt mat sengem lëtzebuergesche Mann deen och Affekot ass. Fir Chrëschtdag kréie si e Bebe. Schéin !
Bannen enger Woch si mir praktesch riicht erof op Algeciras bei Gibraltar gefuer (2.500 Km). Ënnerwee zu Medinaceli treffe mir nach d’Ingrid an den August aus Wien déi mir op der Omanrees kënne geléiert hunn a verbréngen e flotten Owend. Nach eng Visitt zu Cordoba a weider.
Dee schéine Bou vu Medinaceli.
Lëschtegen Owend.
An der Alstad vu Cordoba.
An der Alstad vu Cordoba.
An der Alstad vu Cordoba.
Problemlos geet et mam Ferry a Marokko (zwou Stonnen). Den Zoll war da leider net esou lëschteg. Als éischt hu mir missen duerch de Scanner fueren a schlussendlech beschlagnamen d’Beamte meng Dron. Et ass verbueden eng Dron matzehuelen a Marokko ouni Geneemegung. An dräi Méint kann ech se nees ofhuele wa mir zréck fueren. Schued ech hätt gär am Atlas e puer schéi Fotoe gemaachen.
D'Medina vun Tétouan
Vun Tetouan aus fuere mir weider an de Süden a kommen an d’Rif Bierger déi staark mat Beem bewuess sinn. Zu Chefchaouen, eng kleng Stad op 600 Meter, bleiwe mir zwee Deeg. Chefchaouen gëtt och déi blo Stad genannt an huet eng vun de schéinste Medinas.
Eigentlech wollte mir weider an de Süde mee hunn awer elo decidéiert nees ob d’Küst vun der Mediterrane, also an de Norden, ze fueren bis Nador. Déi Küstestrooss soll ganz schéi sinn a fir dohin ze komme musse mir nees iwwert d’Rif Bierger fuere wat wonnerschéin ass bei dësem super Wieder. Déi Berber déi hei liewe sinn zum gréissten deel Baueren. Haschisch gëtt och ugeplanzt.
Eis Gasfläsche konnte mir zu Nador net fëllen. Strikt verbueden ! Elo geet et weider iwwert Oujda Richtung Fès, déi éischt Kinneksstad déi mir wëlle kucke goen. D’Landschaft ass zimmlech kark, scho bal wéi eng Wüstelandschaft. Heiansdo gesäit een eng Oliveplantag. Dierfer ginn et ganz wéineg. Flott war nach dass mir zu Oujda materlieft hunn wéi d'Equipe vu Marokke an d'Achtelfinal komm ass. Also hei kënnen se och feieren!
Fès, eng Stad vun ongeféier 1,2 Milliounen Awunner, ass déi véiert gréisst Stad vu Marokko an zënter 1981 steet d’Alstad (Medina) ënnert dem Schutz vun UNESCO. Et ass déi gréisste Medina vun der Welt mat 9600 klenge Gaassen. Den éischten Dag huele mir en Taxi deen eis bei e puer interessant Plaze féiert.
Fir dass mir eis do net verléieren hu mir eng Guidin, d’Karima, gefrot mat eis zu Fouss derduerch ze goen an eis déi wichtegst Gebaier ze weise wéi z.B. d’Gierwerei, d’Moschee a d’Medersa gegrënnt vum Fatima el-Fihrya, d’Universitéit mat de Studentewunnengen an natierlech all déi kleng Geschäfter déi mat allem handele wat e brauch.
D'Entree vun der Uni an eng schéin Dier déi an e Bannenhaff geet. NET fir eis!!
Alles wat e brauch fënnt een an der Medina an d'Iesele bréngen alles erbäi.
Duerch Spuenien a Marokko
Op eisem Wee Richtung Süden a Mëttel-Atlas maache mir nach e Stopp zu Moulay-Idriss, eng Pilgerstad mam Mausoleum vum Moulay Idriss. Mir als "ongleeweg" ginn hei net eragelooss duerfir gi mir vun engem Teenager Guide fir 20DH duerch d’Medina op de Bierg gefouert. Herrlech Vue op d’Stad an de Mausoleum. Zum Schluss fuere mir nach mam Taxi op Voloubilis, d’Ruine vun enger réimescher Stad kucken déi 25 Joer n.Chr. vum mauretanesche Kinnek Juba IIgegrënnt ginn ass.
Et ass bal net méigleg en Taxi ze kréie well um 16:00 Marokko an der 1/4 Final spillt!!
Meknès,niewend Rabat, Fès a Marrakesch déi klengste vun de véier Kinnekstied. Hei däerfe mir an d'Grafmosche vum Moulay Ismail eran. Ass jo kee Pilgeruert.
Um Camping zu Moulay, wou mir zwou Nuechte geschlof hu fir Meknès an d’Ëmgéigend ze kucken, hate mir zimmlech Päsch. D’Elektresch hat eng Iwwerspannung déi eisen Ëmwandeler, de Frigo an och d’Luedgerät vum Jang sengem PC futti gemaach huet. D’Kaart vum Frigo ass um elektreschen Deel verbrannt. Och ons Hausbatterie konnt net méi geluede ginn ausser iwwert eis Solarzellen. Fazit !
Keen Elektresch am Camper. Leider reent et och de Moment.
E bëssche Stress ass ugesot. Um nächste Camping huet en Elektriker aus Azrou bei enger "Nacht und Nebel" Aktioun et fäerdeg bruecht dass mir Elektresch op eis Steckdousen am Camper kritt hunn iwwert de stabille Stroum vum Camping. Eis organiséiert Route musse mir fale loossen a fueren an zwee Deeg direkt opTiznit (ënnert Agadir). Hei soll et de « Chez Brahim » (Hidir electro) ginn, deen Installatiounen a Reparature vu Camper mëscht.
Um Wee hate mir awer schéi Vue'en!!
